Madalas na naririnig ko ay marami daw ang galit sa bading dahil daw siguro ay bading din sila at di makapagladlad. Hindi ko maintindihan itong mga katagang ito dahil ibig bang sabihin nito, yung mga femen o extreme feminists na galit sa lalake e mga babaeng gustong maging lalake? O yung mga taong galit sa magnanakaw, gusto din ba nilang magnakaw? Di naman siguro. O baka naman siguro, mas tama yung ibang naririnig ko na may mga galit sa bading dahil baka natsansingan o namolestya ng bading. Posible. Ako mismo ay may mga karanasan na din sa ganyan pero di naman ito naging dahilan para magalit ako sa lahat sa kanila. Kung galit man ako sa mga naranasan ko, ito ay direkta sa kanila at di lahat sa kanila katulad din ng galit ako sa mga rapist na lalake pero hindi sa lahat ng lalake. Eto ang ilan sa mga karanasan ko sa mapagsamantalang bading na di ko na makakalimutan.
Unang beses ng ako ay elementary pa lang. Grade 4 or 5 siguro. Naglalakad ako sa palengke noon at may hinahanap ako na gagamitin sa project namin noon sa isang subject na di ko na maalala. May nakasalubong ako na middle aged na lalakeng payat, maputi at kalbo na di ko naman masabi agad na bading dahil di naman siya yung "stereotype" na mahaba buhok na nakadamit pambabae. Pero napagtanto kong bakla sya nung medyo nagkaisip na ko at naintindihan ko ang sinabi nya. Sabi nya sa kin nung pagkasalubong namin dalawa ay "ansarap mo siguro". Kinabahan ako at binilisan ang paglakad palayo na parang di ko siya nakita. Pagtingin ko mula sa malayo ay lumingon din siya at tumawa kaya lalo ako lumayo at dumiretso na lang sa pupuntahan ko. Yun ang una kong naaalala na encounter sa bakla.
Pangalawa naman ay nung nasa CR sa isang sinehan, high school na ko nun. Grupo ng bading na may edad na ang nakasabay namin sa CR ng mga kaklase kong lalake. Nagkataon na ako na lang ang umiihi ng dumating sila. Halata ko na sumisilip sila habang ako ay umiihi. Kaya binilisan ko na matapos at umalis na lang. Pero baka mali ako pero ang di ko maintindihan ay bakit andami namang puedeng ihian na bakante e bakit sa tabi ko pa pumwesto yung isa.
Pangatlo na naalala ko ay nung college na ko. Sa may pilahang luma pa ng jeep pauwi sa min. Sa CR din. May isang lalake dun na kanina ko pa napansin sa labas na parang di umaalis sa pinto ng cr. Nakailang labas pasok na rin siya dun. Umuulan pa. May dala akong payong. Nung nakaramdam akong maiihi ako, pumasok ako. At pumasok din siya. Ganon din tulad nung isang karanasan ko, sa tabi ko pa talaga siya umihi. Pinakiramdaman ko at wala naman ako narinig na tunog ng pag ihi at nakita ko na nakalingon sya sa lugar ko. Ginawa ko, yung hawak na payong ko ay iniumang ko sa kamay ko na parang handa na kong mamalo. Dun lang siya tumigil ng paglingon at pagkatapos ay umalis na ko sa CR. Naiwan pa rin siya sa loob.
Marami pang mas malala na naranasan ko kung kelan nagttrabaho na ko. Isa na dun yung sa MRT. May isang nakaformal din na tingin ko nag oopisina ang kasabay kong sumakay sa may bandang Magallanes. Clutchbag ang bitbit nya. Nagtataka naman ako kung bakit yung kamay nya ay umaabot sa harapan ko. Di agad ako nagisip ng masama dahil siksikan naman talaga pero iba ang pakiramdam ko sa pagdikit ng kamay nya sa harap ko sa may pundilyo. At ng may bumaba sa sumunod na mga estasyon, nagtataka ko na kahit lumayo ako ay naiiwan ang kamay nya sa harap ko. Pagtingin ko sa kanya ay nakangiti pa sa akin. Nagpanting ang tenga ko at kanina pa pala ako iniisihan ng sira ulong yun. Umurong ako at napalayo ako ng todo. Gusto ko sana siyang sikmuraan kaso anlayo ko na sa kanya at siksikan. At nakarating na ko sa bababaan ko kaya umalis na lang din ako.
 |
| Di naman ganito kasiksikan pero siksikan pa rin talaga. |
Minsan naman, naglalakad ako pauwi sa amin sa may bandang Ynares. Dun kasi ko bumaba galing sa FX. Sa kabilang side, may sumusutsot sa kin. Gabi na nun at mga 11pm. Pagtingin ko sa kabilang side, may lalake na puro foundation ang mukha. Bading. Nakapolo at may dalang bag, kinakawayan ako papunta sa kanya. At pagkatapos ay minuwestra pa nya yung kamay nya na parang may sinusubo. Alam nyo na kung ano yun at pinakitaan ako ng wallet. Galit at inis agad ang reaksyon ko. Ginawa ko, ako ang tumawag sa kanya at galit na galit kong pinapupunta at pinatatawid papunta sa lugar ko. Kitang kita siguro nya ang pamumula ko sa inis kaya lumingon na lang siya sa kabilang direksyon na parang walang nangyari.
Isa pang matindi ay sa may kanto din namin na may tindahan na 2 bakla ang nagbabantay. Mas bata pa itong mga ito kesa sa kin. Pagkababa ko sa jeep, parang nung isang beses, may sumutsot din sa kin at may kasamang hoy pa. Paglingon ko, yung isang bakla ay binigyan ako ng dirty finger sabay katulad din ng ginawa nung isang bading sa naunang kwento ko. Binilog ang palad at kunwaring may sinusubo. Tiningnan ko lang ng masama at dumiretso na ko pauwi. Pero gustong gusto kong makabawi sa sobrang galit dahil sa isip ko, sa lugar pa namin ako binastos. Pangalawa ay mas bata sa kin ang gagong yun para ganunin ako. Nagbihis ako ng pambahay at nagsuot ng sumbrero.
Bumalik ako sa tindahan. Malamang na di ako makikilala dahil nakalongsleeves polo ako nung bumaba ako at nasa kabilang side pa ko ng kalye nun. Pumunta ko sa tindahan. Naghanap ako ng puedeng bilhin. Pansit canton na lang ang naisip ko. At ang nagbenta sa kin ay yung isang tindero na kasama nung talagang pakay ko. Sakto lang sa plano ko. Malawak kasi yung tindahan at may parang karinderya pa. Andun yung nagtrip sa kin sa kabilang side.
Pagkatapos kong bumili dun sa kasama nya ay tinanong ko ito kung ano ang pangalan nung kasama nyang isa. Aktong tatawagin nya yung kasama nya ng sinabi kong "Bakit, sinabi ko bang tawagin mo siya? Tinatanong ko lang kung ano pangalan nya eh."
Parang nagulat na natakot ang kausap ko. Natahimik siya at pagkatapos, nagsalita uli ako ng "Pakisabi sa kasama mo, mag-iingat siya. Pero mamaya mo na sabihin. Pag nakatawid na ko sa kabila." Sabay talikod.
Pagtawid ko, tumayo ako sa kabilang kanto sa tabi ng poste at naging masunurin naman ang kausap ko. Natataranta siyang lumapit sa kasama nya nung pagkatawid ko. Kita ko na kinausap nya at itinuro pa nya ko sa kabila. Nakita nila ako na nakatayo kaya parang natakot pa sila lalo at ako naman ay nakatingin lang sa kanilang dalawa. Malayo man pero kita ko na nanlalaki ang mga mata nila. Natawa ako. At pagkatapos ng ilang minuto ay umalis na ko.
Ilang araw nakausap ko yung kapitbahay namin na may tindahan din at nakausap ko yung nagtitinda na tita-titahan ko na rin dahil kinakapatid siya ng nanay ko. Naikwento ko ang nangyaring ito sa kanya at yun pala ay kakilala nya ang batang bakla na gumawa ng ganon sa kin. Nagpupunta pa nga raw iyon sa kanila. Sabi ko ay tinakot ko lang naman at wala akong balak gawing masama sa kanya. Gusto ko lang turuan sana ng leksyon at pakabahin sa ginawa nyang kalokohan. Kakausapin na lang daw ni tita. Makalipas ang ilang linggo ay nakwento nya at takot na takot nga raw at nagsisisi na ang bata.
May iba pa na nasa pagupitan naman ako na bakla ang nanggugupit. Kinakausap ako kaya sumasagot naman ako. Friendly naman siya. Mahirap din magsuplado at baka ukaan ang buhok ko. Tapos umabot sa personal na mga tanong. Kung may asawa na ba ko. Binata pa ko nun kaya sabi ko wala. Ang sagot ay sayang naman daw. Nabuburo at napapanis lang daw ang katas. Mga ganon biro na tatawanan mo na lang kasi dapat ok lang dahil bakla sila. O kaya mismong mga kaibigan mo na bakla na magbibiro din sa kin na may kasamang hipo sa dibdib o hita. Di ka magagalit kasi biro lang ng bakla. Pero naisip ko pano kung babae gumawa nun? Sasabihin agad na malandi o pokpok. Pag lalake naman e manyak. O kaya makakasuhan ng harrasment. Pero sila, they can get away with it dahil bakla sila. Not that I'm complaining pero di ako naniniwala kasi na oppressed sila. Maraming bagay na mas malaya pa nga sila na gawin kesa sa mga straight tulad ng ganitong mga bagay.
Ilan lang ito sa mga karanasan ko sa mga bakla. Maraming iba pa pero mga minor na lang kumpara dito. Siguro kasi ay lumalaban ako. Di tulad ng isang kababata ko na na-rape siya. At bukod pa dyan, di naman lahat ng engkwentro ko sa tulad nila ay pangit dahil tulad ng sinabi ko, may mga kaibigan akong bakla at marami din sa kanila ay malayo sa mga naikwento ko sa taas. Respetable at kagalang galang. May iba rin na makulit na tulad nating lahat na may natatagong kakulitan. Ako man ay hindi perpekto at maraming nagagawang kalokohan, kabulastugan, kabastusan at kagaguhang mga bagay sa aking kapwa. At sana napatawad na nila ko. Tulad ng pagpapatawad ko rin sa mga taong gumawa ng ganon sa kin sa mga nakwento ko sa taas. Except lang siguro dun sa nakasabay ko sa MRT. Pero di ko na rin siguro yun mamumukhaan. Pero sa kabila ng lahat, dito ko napagtanto first hand kung bakit marami din talaga ang may hindi magandang pananaw patungkol sa kanila dahil sa mga ganitong pangyayari sa ating paligid, at tulad din ito ng pagstereotype sa aming mga lalake o maging sa mga babae man ng mga ugaling hindi kagandahan.
At bukod sa mga karanasan sa bakla sa mga pampublikong lugar, isa pa sa marami akong karanasan ay sa mga snatcher, holdaper at mandurukot. At yun ang susunod kong ikkwento. Kung gano kadami ang nakwento ko sa taas, sindami din siguro yun ng karanasan ko sa mga masasamang elemento sa kalye. Buti na lang buhay pa ako at naikukwento ko pa sa inyo ang lahat ng mga karanasan ko, kanais nais man o hindi.
